ای خوږو حجیانو! په سوریې، عراق، فلسطین، افغانستان، یمن ، بحرین، لیبیا ، پاکستان ، کشمیر او میانمار او نورو سیمو کې د مظلومانو او اسلامي امت لپاره دعا هیره نه کړئ او له خدایه وغواړئ چې د امریکا او نورو مستکبرانو او د هغوی د ګوډاګیانو لاسونه غوڅ کړي.
ګلونو اوریدونکو سلامونه ، د نورو کلونو په شان سږ کال هم د ایران د اسلامي انقلاب ستر لارښود حضرت ایت ا... العظمی سید علی خامنه ای د حج په مناسبت خپله مهمه وینا خپره کړه چې نن سهار د ایرانیو حجیانو مشر او د ولی فقیه استازي حجت الاسلام والمسلمین قاضی عسکر د عرفات په دښته کې ولوستله. په دې شیبې کې د رهبرۍ د ستر مقام د وینا د متن پښتو ژباړه تاسو ته وړاندې کیږي:
بسماﷲالرّحمنالرّحیم
و الحمد للّه و الصّلاة علی رسوله المصطفی و آله الاطهار الابرار و صحبه الاخیار. قال اللّه تعالی: وَ اَذِّن فِی النّاسِ بِالحَجِّ یَأتوکَ رِجالًا وَ عَلیّْ کُلِّ ضامِرٍ یَأتینَ مِن کُـلِّ فَجٍّ عَمیقٍ × لِیَشهَدوا مَنـافِـعَ لَهُم وَ یَذکُرُوا اسمَ اللهِ فیِّ اَیّامٍ مَعلومات.
دغه عرشي انګازه هماغه شان زړونه ځانته رابلي او له پیړیو او پړاوونو، انسانیت ته د توحید په چورلیز د غونډیدو بلنه ورکوي. د انسانیت هر وګړی د دغه ابراهیمي بلنې مخاطب او پرې ویاړمن دی؛ که څه هم ځینې غوږونه یې وانه اوري او زړونه د غفلت او جهالت تر پردې لاندې، له هغه بې برخې پاتې شي، او که څه هم ځینې کسان دغه نړیوالې او همیشنۍ میلمستیا ته د ورتګ وړتیا په ځان کې پيدا نه کړي او یا یې په هر سبب توفیق ونه مومي.
اوس تاسو په دغه لورینې لورول شوې او د خدای د میلمستون په امن وادۍ کې مو ګام ایښی دی.
عرفات او مشعر او منی، صفا او مروه او بیت، مسجدالحرام او مسجدالنّبی، د دغو مناسکو او مشاعرو هر هر ځای ، هر یو د معنویت د زنځیر یوه کړۍ او د روح عروج دی د هغه حج کوونکي لپاره چې د دغه توفیق په قدر پوه شي اور ترې د خپل ځان د پاکۍ لپاره استفاده وکړي او د خپل پاتې عمر لپاره توښه واخلي.
یو مهم ټکی چې هر فکر کوونکی انسان تلوسګر او حساس ګرځوي، د ټولو خلکو او ټولو نسلونو او ټولو کلونو لپاره په یو ټاکلي ځای او واحد زمان او وخت کې د یوې همیشنۍ وعده ګاه ټاکل دي. د وخت او ځای دغه وحدت د حج د فریضې یو اصلي راز دی. بې له شکه د «لِیَشهَدوا مَنـافِـعَ لَهُم» یو ډیر لوړ مصداق دخدای د کور په څنګ کې د اسلامي امت د وګړو دغه کلنۍ کتنه ده. دا د اسلامی وحدت راز او د اسلامي امت سازۍ بیلګه ده چې باید د بیت الله تر سیوري لاندې وي. دخدای کور د ټولو دی:
سَـواّْءَ العـاکِفُ فیهِ وَ البـاد.
حج، په دغه ځای او دغه وخت کې همیشه او په ټولو کلونو کې په لوړ غږ او ښکاره منطق سره مسلمانانیووالي ته رابلي او دا د دښمنانو د غوښتنې مقابل ټکی دی چې په ټولو زمانو په تیره بیا په اوسني پېر کې یې مسلمانان د یو بل په وړاندې لام بندۍ ته هڅولي دي.
نن د مستکبرې او جنایتکارې امریکا عمل ته وګورئ. د اسلام او مسلمانانو په وړاندې د هغې اصلي سیاست د جنګ جوړول دي. دهغې خبیثانه غوښتنه او هڅه د یو بل په لاس د مسلمانانو وژل دي. پر مظلومانو د ظالمانو وراچول، د ظالم لوري ننګه کول، د هغه په لاس د مظلوم لوري بیرحمانه ځپل، او مدام د دغه بوږنوونکې فتنې اور ته پوکي وهل. مسلمانان باید هوښیار او بیدار اوسي او دغه شیطاني سیاست شنډ کړي. حج د دغه هوښیارۍ زمینه جوړوونکی دی، او دا ده په حج کې له مشرکانو او مستکبرانو د برائت فلسفه .
د خدای یاد د حج روح دی. راځئ چې په هر حال کې خپلو زړونو ته د رحمت په دغه باران سره ژوند او تاندوالی وبخښو او په هغه ذات توکل او باور چې د طاقت، برم ، عدل او ښکلا سرچینه او آر دی په خپله زړونو کې کلک کړو. په دې بڼه کې به د دښمن پر چل ول بریالي شو.
ای خوږو حجیانو! په سوریې، عراق، فلسطین، افغانستان، یمن ، بحرین، لیبیا ، پاکستان ، کشمیر او میانمار او نورو سیمو کې د مظلومانو او اسلامي امت لپاره دعا هیره نه کړئ او له خدایه وغواړئ چې د امریکا او نورو مستکبرانو او د هغوی د ګوډاګیانو لاسونه غوڅ کړي.
والسّلام علیکم و رحمة اللّه
سیّدعلی خامنهای
۱۳۹۷ د زمري دمیاشتې اته ویشتمه
د ۱۴۳۹ هجري سپوږمیز کال د ذی الحجې اومه نیټه
..............................